如果你曾經試過單戀人，都應該試過委曲求存咁去乞求對方嘅愛，更不惜做任何事或者改變自己任何嘢，只為博取對方半點歡心。我都試過，我都做過呢啲又卑微又丟臉嘅事。……而作為一個過來人,我想畀你一個忠告──千祈唔好再繼續，唔好做一個要乞求別人一點愛嘅愛情乞兒。

以前我都以為愛一個人就要不惜一切，又以為只要自己做得好啲，對方就會鍾意自己，但原來一個唔愛你既人，即使你走去減肥整容賺多啲錢，對方都一樣唔會因此而真心愛上你。

我又曾經試過單戀一個人，單戀到迷失晒自我，好想喺對方面前飾演一個美好嘅自己，好怕自己會做錯啲咩講錯啲咩而令對方唔鍾意。於是每次見到對方，我連嘢都唔敢講多，send個Whatsapp 都要諗好耐……諗到最好嘅回應方式同措辭先敢send出去，甚至連喺自己嘅社交平台打啲咩都要諗，因為好怕對方睇完會對我扣分……而家回望番個陣時嘅自己，我都終於明白到嗰個卑微到抬唔起頭嘢自己，其實半點魅力都無，而且當時嘅我連自己都唔愛自己，又真係好難去怪對方唔愛自己。

而家嘅我終於明白，愛情唔係完美無瑕嘅人先值得擁有，愛情係容得下缺憾。更重要既係一個人想得到別人愛之前，請先好好學識點樣去愛自己，唔需要害怕去做自己，唔需要刻意隱藏真實嘅自己！你要相信，一個真正愛你嘅人，係會擁抱真實嘅你，將你嘅優點同缺點都一併愛上。

更多適合您在夜裏獨自細讀的書：